Am vergange Wuchenänd si mir mit em Infanterieschützeverein Wangenried am Eidgenössische Schützefescht z Chur gsi. Mir hei i ere Alphütte z Trans uf rund 1600 Meter über Meer übernachtet und  dört vo Donnschtig bis Sunntig es paar unvergässlichi Täg verbringe.

Am Donnschtig si mir agreist und hei dr erscht Aabe bieme gmüetliche Grillabe, guetem Ässe und gselligem Zämesi gnosse. Am Frytig hei de d erschte Wettkämpf uf em Programm gstande. D Resultat si unterschiedlich usgfalle – einigi Schützinne und Schütze si zfride gsi, anderi weniger.

Am Samschtig isch es mit üsem Verein a ne witer Schiessstand gange. Spöter het sech usegstellt, dass das dr schwierigschti Schiessstand vom ganze Eidgenössische Schützefescht gsi isch. Trotz de anspruchsvoue Bedingige isch mit viu Isatz und Engagement gschosse worde.

Trotzdem hei am Änd vom Fescht praktisch alli e Chranz oder e Medaille chönne hei näh.

Dr Samschtigabe isch de e witeri Höhepunkt gsi. Mir hei zäme grilliert, glacht, gfieret und bis spät i d Nacht über s Schüsse, persönlechi Sache und viu angers gredt. Die kameradschaftliche Stunge hei das Wuchenänd zu öppis Bsunderem gmacht und dr Zämehaut im Verein no meh gstärkt.

S Eidgenössische Schützefescht 2026 z Chur wird üs nid nume wäge de schiesssportliche Leistige, sondern ou wäge de viele schöne gmeinsame Momänt no lang i Erinnerig bliibe.